سبيسي الخاص :$

Archive for يوليو, 2009

ندى الزفت الحيوانة الزقانة الواطية :@:@ بس احبها المشكلة :$ وحركتها فلصرفة عند الباب


ندى الزفت الحيوانة الزقانة الواطية :@:@ بس احبها المشكلة :$ وحركتها فلصرفة عند الباب

هااااااايوو
 
مافي جديد اليوم ولافي شي ابغاا افتكرو ابتسامة ساخرة
 
غير انو فلصرفة ندى الحيوااااانة حزنسحبت يدي علا يد (وحدة مضاربة معاها) بنتبنت <كدا خخخ
 
وربي كانت حتطيح الحرمة ككككككككككككككككككككككك
 
اصلن فرحانة تقول لازم تدوني جائزة غاضبغاضب
 
والله انضربت ماس الله يصيبك ياندى
 
حطيت الموقف عشان افتكروو لانو من ابيخ المواقف اللي سارتلي فحياتي
 
بس كدا يلا خارجة بااااااااي
28 جمادى الأولى 02:48 م |

كنت حنشل شلل كامل ( شوفت الموت للمرة الخامسة )


كنت حنشل شلل كامل

والله ماني عارفة كيف ابدا دا البلوق
 
دي المرا الخامسة اللي اشوف الموت فيها
 
غير عن هرجت المصعد وهرجت الحريقة ولا لمن غرقت ولا عملية الزايدة
 
ولا لمن كان راسي حيتقطع بلمرووووحة  <يبغالها بلوق خاص خخخ
 
دي المرا كونت حنشل شلل كامل حزن
 
تخيلو طلعت فوق الطاولة اخر حصة ومرا متحمسة <عشقي الطاولات
 
وجيت ابغا انزل وووطبعن وقفت علا طرف الطاولة عشن انزل الا تميييييل علا جهه ماني واقفة
 
وطرااااااااااااااااااااااااااااااااااااااااخ
 
ماتلاقوني غير مبطوحة علا الارض
 
وربي ماقدررت اتحرك فلبداية ضحكت عالطيحة بس لمن ضحكت حسيت جنبي يتقطع وراسي يعورني <بدا الاحساس يوصل خخخخ
 
جلست ابكي من التعويرة رجلي مرا عورتني وضهري وحوضي حسيتو انكسر وراسي ااااه
 
جو البنات بيقومووني بس حاولت ارفع نفسي من الارض حسيييييت الالم زاد فجنبي قلتلهم لاااااااا
 
انشليييييت خلاص ودمووووعي تنهمرررر  
 
علا صوت الطيحة جو ابلتين وسحبوني بشويش لين ماوقفت بكامل قواي
 
وقالوو خوفتينا عليكي ومدري ايه
 
انا لين دحين راسي يعورني محل الطيحة ووجنبي ورجلي اليمين مرا تعورني
 
ااااه بسس الحمدلله جات سليمة وماا مت ولا انشليت ولا كان انحرمتو مني  خجل
 
الحمدلله شوكررررن يالله
25 جمادى الأولى 01:45 م |

خرجنا بدري من المدرسة مع جارتي و اختي و ماما


خرجنا بدري من المدرسة مع جارتي و اختي و ماما

السسلام عليكم
 
كيفكم ؟؟ خجل
 
اليوم رجعت بدري من المدرسة
 
ماكان في شي موهيم واجلو الاختبار ابتسامة
 
نص الفصل غايب تعبانين بعد رحلة امس
 
وحصتين فراغ رياضيات غايبة ابلتنا واخر حصتين تدبير مريض
 
فمرا قرف ودقيت علا ماما هواتف جوالوخرجت من بدري رائع
 
مع جارتي واوختي سيارة
 
واحنا فلطريق ماما قالت تبغو فطور بيتزافنجان قهوة<يختي عليهاا
 
احناا ماصدقنااا ايوووة ايوووووة <محرومين ككككك ابتسامة عريضة
 
وبس وقفنا بقالة ولملمنا قرابيعنا علا قولهم كككككككككك
 
ورجعنا البيت طفحناا والحمدلله إغاظة
 
صورنا القرابيع اللي اخدناها انا وجارتي واختي
 
اترككم مع الصوورة
 
 
…………………بعد مااكلنا وصلنا جارتي لبيتها ورجعنا …..
 
لمن جيت ارفع الصورة لقيت صورة قدييييمة لطفح برضو بس فلهدا (راجعو بلوق رحلتي للهدا)
 
ودي الصوووورة
 
 
يلا ياحلوووووووين انا طالعة
 
اشوفكم فبلوق تاني
 
فمااااان الله
23 جمادى الأولى 01:15 م |

رحلتي للشلال مع المدرسة فلة مرا فن :$


هلو افري ون
 
كيفكم ؟ يارب كويسين
 
توي راجعة من الشلال كح
 
ات واز مرا فن بس الحريم اللي يشتغلو هناك اخلاقهم مو بس زفت
 
ازفت من الزززززززززفت يعاملونا كاننا بنشحت عندهم الله يشيلهم غاضب
 
وصلنا الشلال 10 وقفلو الالعاب 12 تخيلو بالله اندهاش
 
….اول ماوصلنا …
 
ركبت الامازون كنا 6 بنات بس رائع
 
مافي داعي لذكر الاسماء بس ححط الالقاب للذكرى فقط لااكثر
(دونا,توتا احلا,رعام,سوسيتا,انا,ندودتيخجل)
 
وبعدها ركبت الشواية مرا تخووف صوتي انبح من الزعيق
 
وركبت قطار الموت مرا وااااااااو ركبتو مرتين عشان المرا الاولى مع ندى
 
المرا التانية مع ود ولينا انشالله اتشجعو بعدهااا هع
 
وبعد كدا ركبت النجمة وابلة بشاير ركبت مع سوسن كاااااي
 
حقدددت علا سوسن بعدها <حاخد كف لو قريت كلامي كككككككككككك
 
بعديين طوالي دخلونا علا جوا <قفلو الالعاب اللي برا
 
قمنا جررري عالاسكيتنج احسبو سهل
 
وربي ياطحت طييييح خخخ
 
مسكينة رودي كسرتها من كتر مااسحبها كل ماطيح اسحبها
 
شوية سمعناهم نادو .. الرجاء من طالبات مدرسة الفضل الاهلية التوجه لمطعم الطازج
 
قولت مابغا اروح .. متعتي اهمممممم شي .. ماطفحت .. لمن خرجنا جيعااانين
 
ندور علا مطعم انا وسوسيتا وميمي ورودي مرا جيعانين بس مافي كلها مقفلللة حزن
 
ومالقينا صحباتنا ااااه اشترينا ببسيات وجلسنا نلفلف قدام المديرة انو نبغاها تسالنا
 
سالتنا وادتنا طفح .. طوااالي اكلناا رغم انو كان بارد بس الجوع جووووع
 
وبعدها لفلفنا وكدا وطلعنا نبغا نروح حق المرايات طلع مقفل
 
وطوالي خرجووووناا  يقولو الرجال بيخشو
 
ااااه قهررررر مامداناا نلعب كويس
 
بس دا اللي سار ورجعنا وانحشرنا فلباص وعلا مكة
 
ورجعت البيت معا جارتي وبس
دي الصور تصوير سوسيتا صحبتي وهيا راكبة فقطار الموت معاناا تخيلوووو <مجنونة
 
اكتر شي قهرني انو ماجبت كاامي ولقيت كتييييررر جايبين حزن
 
غششششش اصلن دا جزاتي اطبق قوانين المدرسة
 
فصورتلكم الاشيا اللي فشنطتي بعد مارجعت للبيت شوفووها
 
 
يلا في موساابقة صغيرة حبيت اسويها لكم
 
اللي تقول اسامي كل الاشيا اللي فلصورة حتربح معاناا جائزة
 
وهياا (…..بوسة من دودي ككككككركررككرر…)
 
اوكي ؟ اسرع وحدة تقول ايش الاشيا كلها الي فلصورة حتفوز
 
يلا فمان الله
 
22 جمادى الأولى 05:38 م | 1430هـ

تعرف علي اكثر ايميل الصداقة صديقك اصدقاء 2009 معرفة اصدقاء بكل تفاصيلهم الدقيقة ايميل جاني


تعرف علي اكثر ايميل الصداقة صديقك اصدقاء 2009 معرفة اصدقاء بكل تفاصيلهم الدقيقة ايميل جاني

هاااااي
ايميل جاني

الهدف من هذا الايميل هو معرفة اصدقاء بكل تفاصيلهم الدقيقة

جاااااتني رسالة وجاوبت عليها
 
بس انتو ماحينفع ارسلكم هيا
عشاان كدا قولت انزللهاا هناااا واللي بيرد يررررد
 

الإجابة

السؤال

5 ونص

1. متى استيقظت هذا الصباح؟

 ماس

2. الماس أم الؤلؤ؟

…..

3.ما آخر فلم شاهدته بالسينما؟

 دكتور فيل ,اوبرا,تايرا  <اش عرفكم ثقافتي امريكانية كككككك

4.ما هو برنامجك المفضل؟

سندوش بجبنت كيري

وحليب شووكلت

5. عادة ماذا تتناول بالفطور؟

 

اللحم بانواااااعو

6. ما هو الطعام الذي لا تفضله ؟

سي دي من صحبتي فيلو اغاني قديمة من زماااااان

7. ما هو السي دي المفضل لديك في هذه الأثناء؟

خليهم يخلونا وحتشوفوني كل يوم بسيارة

8. أي نوع من السيارات تقود؟

كل انوااااع السندوشتات

اهم شي حاااااار

9. سندويشك المفضل؟

صفة ام 3 وجيه لووووول

10. أي من الصفات التي تكرهها؟

جينز وتي شيررت

11. نوع الملابس المفضل لديك؟

بريطانيا

12.اذا صارت لك اجازة و خيروك أي مكان بالعالم وين تحب تروح؟

مافي ماركة محددة 

اللي يعجبني القطو

13. ماركة ملابس مفضلة لديك؟

مدري بدري عالسوال دا مررررا بدري

14. عندما تتقاعد وين ودك تستقر؟

دي السنة خجل

15. أي عيد ميلاد مميز مر عليك؟ من عمرك انت

يمكن السباحة

16. رياضة تحب تشوفها؟

الرسالة ماعدت حدود مكة

بس البلوق دا الله اعلم اي حدود حيوصل

17. ابعد مكان سترسل هذه الرساله له؟

نو كومنت

18. أي الاشخاص تتوقع بيرد عليك

يوم 7 شهرر ذو القعدة

19. متى عيد ميلادك؟

بلاش عيد ميلاد , خلوها يوم ميلاد

احوب السهر اكتر 

لاكن احلا شي لمن تصحي الساعة 3 كدا واااااااااااو هدوء 

20. هل انت شخص مسائي ام صباحي..ني تحب تسهر و الا من النوع اللي يفزع من الصبح

اتنين

21.رقمك المفضل؟

  يب كان في بسة وشردت وارنب ومات وفي اسمااااك كتير بس تطفش

22. عندك حيوان في البيت؟

 مااافي

23. أي خبر جديد تحب ان نشاركك فيه؟؟؟

اسير شغالة كاااااااااي

24. شنو كان حلمك و انت صغير؟؟

طيار , دكتور, مهندس….

مبسووووطة بس مرا نعساااانة

25. شلونك اليوم؟

حلى المارس بلكورن فليكس      

26. شنو نوع الحلاو المفضل لديك؟

جوري

27. وردتك المفضلة؟

خااااااص  

29. أي تاريخ بالرزنامة تنتظرة على أحر من الجمر؟

 دودي ال عسل 

30. اكتب اسمك الكامل؟

ناثينق

31. ماذا تسمع في هذه اللحظة؟

 بطاطس

32. ماذا كان اخر شي اكلته؟

 اصلن فين بشوف يعني بس ادا شوفت حتمنى هع

33. هل لمن تشوف شهاب تتمنى؟؟

كوووحليه كككككك 

34. اذا كنت طبشورة أي لون تحب تكون؟؟

محد

36. من هو اول شخص كلمتة بالتلفون اليوم؟

بيبسي داااااايت

37. مشروبك الغازي المفض

 برجر كينج , ماك

38. مطعمك المفضل؟

بلاك

39. لون شعرك الحقيقي؟

  عادي العاب بنات خخخ

40. لمن كنت طفل شنو لعبتك المفضلة؟

شتاااء

41. الصيف أم الشتاء؟

احضان

42. القبل أم الاحتضان؟؟

شوكلت

43. شوكولاته أم فانيلي

 قهوة

شاي أم قهوة؟

يب

45. هل تبي ربعك يرسلون لك الايميل هذا مع اجابات

اليووم بكيت من الضحك ككككككك

46. متى كانت آخر مرة بكيت فيها؟

  ارض 47. ماذا يوجد تحت سريرك؟
امس رحت المستهلك واشتريت قرابيع وشيبسات وهبل كدا

48. ماذا فعلت بالأمس؟

ابتسامة من الله  

49. من شنو تخاف؟

اللي يجي ههههههههههههههه

50. تحب الحلو و الا المالح؟

ماااعندي

51. كم مفتاح موجود بميداليتك؟

 12 سنة وانا بدرس

52. كم سنة مرت عليك بوظيفتك الحالية؟

جمعة

53. يومك المفضل بالاسبوع؟

جدة , مكة

54. في كم منطقة عشت؟

يب الحمدلله

55. هل تكون صداقاتك بسهوولة؟

 كتير

56. لكم شخص بترسل هالإيميل ؟

الله اعلم خخخخخخ

57. تتوقع كم واحد بيرد عليك

21 جمادى الأولى 04:54 م |

انا و الرسام ورسماتي اللزيزا زي صحبتها طبعن هع


انا و الرسام ورسماتي اللزيزا زي صحبتها طبعن هع

هايوو
 
ازيكو؟؟
 
دي بعض رسمااااتي اللي نزلتها فمنتدا ولاقت اعجاب الكثيرين لوول
 
رغم انو ماهي قد كدا بس قولت اخليكم تشوفوهاااا
 

——————————————-
 
 هادي انااا كونت برسم نفسي بس طبعن هيا احلا مني حيرةخخخخخ

—————————-

 
 وجبتي المفضلاا من مااااك

يلا يلا ابغا اشوووف رأيكم فيها

 

قبل لاانقلع وافككم مني خخ

 

في لعبة رهيييييييييبة

انو انتا دكتور وبتجيك مريضة وتعالجها

ادعسس هناا

( هوا راح يحطلك ادواات كتير ابرة ودباسة ومقص وكريم ومدري ايه ..

وكمااان راح يكتبلك فوق فلمربع الاداه اللي لازم تستعملها)

ان شالله تعجبكم

سلام

21 جمادى الأولى 04:44 م |

ابغى انتحر الحياة معفنة الدنيا كلها مشاكل ومضاربات ومافي شي حلو حياتي نحس منحوسة


 
احم احم كح كح الصوت واضح؟ خخخ
 
اول شي قبل لاادخل فلموضوع اللي شايف نفسو كدا زي فلتوبيك اللي فوق
 
ابغى انتحر الحياة معفنة الدنيا كلها مشاكل ومضاربات ومافي شي حلو حياتي نحس منحوسة
 
عندو خيارين : <وفلحالتين ماحتخسر شي ابتسامة
 
1- اما يكمل البلوق وميبي يستفيد من كلامي ويعجبو وتسير حياتو احسن باذن الله
2- ادا كان من النوع الزعول واللي بيقول ليه تتريق وكدا ودي حياتي فلايكمل احسن ويدق علا مربع × اللي فوق
 
يلا انا حبدأ
 
اول حاجاا انتشرت فلاوقات الاخيرة الشكوووى , ترى الشكوى لغير الله مذلة <سرت زي الصروب لووول
 
بديكم مثال اكيد مر عليكم .. يعني تجيكي وحدة بس تتبكبك وحياتي معفنة وحياتي فيها وفيها وامي مدري اشبها وابويا مدري اشبو وابا انتحر 
 
مو يوم او يومين او اسبوع او شهر تتشكى .. لا كل حياتها كدا كل يووووم ماعندها كلام غير تتشكى وتقول مشاكلها
 
وانا حزينة وانا مدري اشبي وانا مكتئبة يختي الله يشفيكي ماقلنا شي بس مايسير تنكدي علا خلق ربي
 
اجي فيوم مبسوطة تجيني ووحدة من ايااهم تقولي : تخيلي يادودي امس سرلي كدا وكدا بكاءحزن اتخيلي نفسك محلي يادودي ومدري ايه
 
نكككككدددددددددددددتي علا ابو ابو جدي الله ينكد عليكي خلاااااص ارحمونا يررحم امكم فجلسة وحدة قدرت تغير نفسيتي زفت 180 درجة
 
واي شي حلو يسيرلها تفسرو بطرررريقة جدن جددن غبية يعني  مثال وحدةابوها جبلها شي بسيط ممم اتخيلو اي شي بسيط كدا
 
بتقول بيشتريني بل(الشي اللي اتخيلتوه) مسوي طيب معاياا بعد ما حرمني اروح عند صحباتي وماخلاني اروح مدري فين والخ….. <<وتجلس تعدد فاشيا سارت من زماان ومالها داعي
 
ولا التانية , محد يحبني فدي الدنيا اموت احسلي وارتاح واريح اهلي , كل مااعرف احد اسويلو مشاكل
 
يختي حتا ادا انتي مشاكلك وهمومك زي الزززززززفت كلناا بنمر باوقات كدا بطلو هبل وشكوى وعيشو اللحضة
 
ترا مررررا اكرره اللي يتشكوو وكل حياتهم نكد فنكد جرو اب بيبولز ترا الدونيا حلوة علا قول ننوسة (نانسي)
 
تفاؤلو بلخير تجدوه وربي الدنيا حلوة بس انتو افهموها لاتشوفو بس الجانب السلبي
 
 شوفو كل شي كويس وحلو فيها , قبل لاتنامو افتكرو كل شي سرلكم فليووم من الصباح لليل
 
وخزنو فمخكم الاشيا الحلوة اللي سارت حتا لو كاااانت بسيطة
 
بقية الاشيا الوحشة كللهااا ديليت امسحو ابو ابوها من راسكم لانو حتاخد مساحة علفاضي إغاظة
 
ممكن سوال اخير لدي النوعية من الناس (الشكاميين) .. <انا مخترعة اللقب دا وحقووقي محفضوضة  وهوا اختصار ل (الشكاوين + المتشائمين)
 
يعني ادا جلستو تتشكوى ايش اللي حيتغير؟ بلعكس حتزيدو نفسكم نكد ولا اللي يقولو ياريت الانتحار حلال كان انا اول وحدة انتحرت
تخللللللللف وربي
 
شوفو صح انو مو كويس الواحد يكتم بس برضو مرا مو كويس بس يجلس يتشكى يعني ادا شي مرا ضاااااغط عليكي اشتكي
 
بس مو اي شي حتا الاشيا التافهه واللي مالها داعي بكدا بتنكدي علا نفسك وتنكدي عللي حولينك  ترا كلنا عندنا هموم ومشاكل
 
بس اهم شي الواحد يحوب حيااتو ويعيشها ويبسط نفسو باي طريقة قدامو (اوف كورس بدون مايغضب ربنا )
 
اي شي فبااااالك سووووويه وربي حياتنا حلوة بس محنا حاسيين بيها ورح نندم عالاوقات اللي ضيعناها واحنا بنتشكى وننكد علا نفسنا باي طريقة
 
يلا عييييييييشووووووووو وقولوو وراياا
 
اناا ابغىى اعيييشش
 
اناا احوب الحيااااااااة
 
انا احوب الدونياا لانو (…………) فيهاا خجل <ملو الفراغ باي شي تحبوهقلب أحمر
 
انا اعييييييشش اعيش اعيششش
 
انا اعييييش خخخخخخخخ
 
حصري لسبيسي
 
اختكم :
 
دودي ال عسل
21 جمادى الأولى 04:15 م |

بداية يومي زي الزفت ونكد ,, ونصو زي العسل , الله يستر كيف نهياتو خخخ


هااايوو
 
ازيكوو ياقدعان
 
طبعن اليوم سبت , الساعة 5:30
 
صحيت من نومي علا صووت رحمة الخافت , فتحت عيوني بشويش وقمت جري عالحمام<ماتلاحضو حياتي كلها جرري خخخ
 
شسمو .. رحت اتوضيت وصليت الفجر وفكيت شنطتي حليت واجب الرياضيات + راجعت الفيزيا شويتين
 
قمت واخدت شاور سريع (جسمي بس , اكره اغسل شعري صباحن) ,,
 
وبعدها لبست مريولي المعفن ورفعت شعيراتي المتطايرة
 
وارتديت عبايتي وجزمتي وحملت شنطتي او حقيبتي زي مايقولو خخخ وجلست فلصالة اشرب حليب بالشوكلت خجل
 
..>>,,,, الا الان كلو تمام والابتسامة تعلو شفتاي الورديتانخجل<مصدقة نفسي كككك
 
شوووووووية يجي الاعصااار والنكد والغم فجاااااة وحدةحيرةبكاءاندهاش ,سمعت صوت ضجيج وصراخ امي يتعالى <مدري اشبي عالفصحى اليوم هع
 
انها تصرخ ,, ولكن ماذا تقول؟؟ لااكاد افهم حرفا واحد .. فموجات التردد الصوتي (الهيرتز) الذي يطلقه فمها اعلى من ان تستوعبه اذناي الصغيرتين كككككك
 
(خلاص طفشت خلوني ارجع عاميية .. الموهيم انو مامي كانت تزعق لااسباب شخصية
 
ومرا كانت معصببببببببة ومادتناا فلوس الرحلة بكاءحزن وانطردنا من البيت طردة الكلاب
 
(عندنا عيب فعيلتنا ال عسل انو اي واحد ال عسل ادا عصبب خلاص يعصب على كل اللي قدامو حتى لو مالهم صلاح)
 
^^^ عشن الاتي خسر حطيت الالوان نغزة زي مايقولو كككككككككك <اتحادية وتتريق شوفتو كيف حزن
 
بعدها فلسيارة صمت تااام هدوء لايسمع سوى صوت اولاد الثانويتين اللي جنبنا الكلالالالاب
 كلناا في السيارة زعلانين ومنكدين عشان الزعيق والتهزئ اللي اخدنا وعشان ماحنروح الشلال اهئ اهئ
 
وصلت للمدرسسسسسة قولت للبنات بنااااات ترا ماني جاية محد صدقني حسبوني امززح

بس ندو نزلت معايا الادارة نترجى ماما توافق او تغير رأيها بمعنى اصح .. ودقيت علا ماما ميت الف مرا ماترررررد
 

بعدين ندى قالتلي هاتي رقمها اديتها رجعت دقت وطوااااااااالي ردت هع هع ,, كلمتها وكدا
 
واول ماقفلت قالتلي ندى ترا خلاص رح تجي الساعة 10 وتديهم فلوس الرحلة وحتروحي<عشنك تحوبي الموف قلب أحمر
 
اناا هيييييييييه هييييييه ,, نسيت اقولكم ترا كان مقلب من ندى لمن قالتلي ماهي جاية هع غير كدا هيا تعبانة اليوم
 
انشالله تتعافى عشاااان تنبسط بكرا معاناا حزن 
 
اليوم كان مرا حلوو والحصص سريعة بس اخدنا حصتين فيزيا اوووووم النكد وربي الحصتين دي
 
قبل شوية رجعت من المدرسة .. ودوبي خشيت ايميلي قولت احطلكم ايش حصل
 
يلا سي ياا

طقطة طفشانة + رأيكم في الاستايل الجديد لسبيسي العزيز


هاااااي كيفكم ؟؟
 
انشالله كويسين
 
اليوووم جمعة <ياحوبي لدا اليوم
 
رغم انو كل اللي اعرفهم يكرهوو لانو بعدو سبت بس مدري ليه احوبو <<ماكانو عشن يوم مانولدت خخخ
 
الموهيم
 
بعد بكرا (الاحد) رحلة الشلال
 
ولين دحين ماقررت قرار نهائي اشيل الكاام او لا (برضو حطولي رأيكم بـ كومنت)
 
خايفة اشيلو واتوووورط ورطة مالها نهاية , وخايفة مااشيلو ومايفتشو وانقهرر قهرر انو ماصورت شي
 
مع نفسسهم
 
اني ويزز اليوم رحت المستهلك (متاجر السعودية حالين ( <<بس ماسك معانا الاسم القديم خلاص
 
الموهيم انو رحت وفلطريق فلسيارة مضاربات مع سرو علا اي شي
 
لمن وصلنا انا جرري علا قسم الحلويات والشيبسات , ولقطت شيبسات وشوكلت وهبل كدا (قرابيع علا قول ماما خخخ)
 
رجعت البيت بحطها بس ماكفت الشنطة اللي حشيلها معايا <<تكفي ادا حشرتهاا بس مابغا الشنطة تسير زي الكورة بيقولو ايش دي القروية كككك
 
فاا خرجت اشياا وخليت الاشيا الموهيمة وبس خليت : مالتيزرس وشسيبس حار واكسترا وحلاوة مصاص وام اند امزز
 
عموومن انشالله مااجوووووع داكاا الجوع واضطر اطفح دي الاشيا خخخخخخ
 
وااااااا صح افتكرت شي
 
برايفت : ابلة احلالام كتابي الكيميا ضايع وانتي مابتخشي مسن الا مرا فلسنة
 
فا ازاا عندك كتاب كيمياء ثاني ثانوي الترم الثاني <ثثثثثث ههههههههههه الموهيم ازا عندك ابغاه لو سمحتي
 
لانو جدن جددن حايسسسسسة كل يوم وحدة تقولي بجيبلك وعندي وتاني يوم تقول مالقيت <نغزة لوحدة إغاظة
 
……….,,,,,,انتهى البرايفت,,,,…………
 
قايز مالاحضتو شي ؟؟ خخ غيرت ستايل سبيسي
 
الكلبة سرو تقول زي ماهواا حرام حطمتني
 
كانت الخلفية بلاك وفيها جماجم ملونة وخلفيت الكتابة بلاك شفاف والبنر كان بلاك وفيلو الواااااااان
 
حسيت دا بناتي وكيوووووت اكترر خجلانتو ايش رأيكم ؟ خخخ انشالله حغير دا كمان قريب
 
<<تعشششق التغيرر رائع
 
يلا وربي ماني شايفة الكيبورد من النوووم اللي فياا نائماصلن عيوني بتتغمض لحالها مدري ايش جابرني اجلس ياريتكم تستاهلو بس
 
 (اتغشمر خخخ فديتكم والله خجل)
 
^^^
يمدحو التضليل هع
 
ممممم ايوا صح ترا رأيكم فستايل السبيس مرا يهممممني لاتبخلو علياا بيلو اوكي؟
 
فماااااان الله ياعسووللين وعسوووولات

اشتريت كاميرا ديجتال سوني sony t77 من جرير امس


 

اشتريت كاميرا ديجتال سوني sony t77 من جرير امس

هااي
 
كيفكم ؟
 
امس فليل رحت جرير واخدت دي الكاميرا مرا تصوويرها ماشالله كويس
 
10 بكسل وزوم ×4 ومحدد الابتسامات وطبعن الشاشة لمس
 
دي صورها
 
Sony Cybershot DSC-T77
 
 
Sony Cybershot DSC-T77
 
 
Sony Cybershot DSC-T77
 
 
حزرو ايت لووون اخدت إغاظة
 
البينك خجل
 
تخيلو بالله مشتريتها عشن بصور للرحلة ماما تقولي لا ماتشيليها بكاءحزن
 
يلا خير انشالله مناا للاحد يحلها حلال هع
 
بااااااي


رحلة لـ الشلال مع المدرسة يوم الاحد مرا حماس


رحلة لـ الشلال مع المدرسة يوم الاحد مرا حماس

هااااي
 
كيفكم ؟؟
 
انشالله كويسين خجل
 
الموهيم اليوم ادونا اوراق رحلة للشلال يوم الاحد بس للتنوي رائع
 
مرا فللللللللللة انشالله فصلنا كلو رح يروح عارفين الفلة انو جدة ومع صحباتنا وكدا
 
فمرررا حماس , افكر اخود لاب توبي بس ندى تقلي عشن نلعب وهبل وفين ححطو
 
ايش كماااااااان
 
القهر ممنوع الكاميرات والجوالات وجااااع وجااااااااااااع غاضب
 

يلا انشالله ننبسط ونفلها علا الاخر وكدا
 
انشالله ادا قدرت اصور حصور وانزل الصور
 
بااااااااااااااااااااي

مدرسة الفضل الاهلية مدارس مكة بنات ثانوي متوسط المديرة مرفت العمودي ميرفت العامودي (كل شي تبغو و تحبو تعرفوه عن مدرستي الحبيبة <<طوووط ميت خط خخخخخ معلومات)


السلام عليكم
 
مدري كدا جات فراسي اكتب عن المدرسة
 
صراحة احلا شي فمدرستي صحباتي خجل
 
بس دا مايمنع اني اكتب عنها
 
معلومات عن المدرسة :
 
مديرتنا مرفت العمودي
 والمدرسة مبنيين (2 مبنى خخخ) جنب بعض
 مبنى للـ متوسط ومبنى للـ تنوي
 
موقعها : فـ شارع الستين رائع
 
الاشياء الي قارفتني في المدرسة كتيررررررر بس رح اقول اهمها واللي يعني سهل انهم يزبطوها لكن مدري ليه مطنشين
 
اول شي  :
الطوابير
 
المفروض طوابيرنا مو مع المتوسط زي بقية المدارس لانو ززززززحمة وحر وكمان يخلونا نسوي رياضة في الصباح فحرام عليهم كدا
 
تاني شي :
النشيد الوطني والرياضة والنطنطة الي نسويها , قريت فسبيس وحدة اضن لولو انو مدام يبغونا وطنيين ونقول النشيد الوطني فلصبح واحنا تعبانين
 
ليش الابلات كمان والمديرة مايغنو معانا النشيد الوطني ايش معنى احنا؟؟ زينا زيهم مدام يبغو يسوو وطنية يطبقو هما كمان
 
نفس الشي الرياضة زي مايخلونا نطنط من الصبح بالمراييل والشنط والزحمة دي المفروض يخلو الابلات ينطنطو معانا ليه العنصرية دي
 
تالت شي :
المقصف
 
وربي تعززيييييبب واتحدا وحدة تنكر تموتي عبال ماتخشي وتصفر وانتي لسا مااشتريتي
 
يعني حيموتو ادا سو مقصف تاني للمتوسط ؟
 
رابع شي :
((الابلة دايمن هيا الصح والطالبة غلطانة لو ايش سار )), يعني دي النضرية مدري مين حطها
 
يجونا ابلات مايعرفو يشرحو وربي لمن اقرا الدرس من الكتاب افهم احسن من شرحها , ولمن نشتكي ومانبغاها
 
يقولو انتو ماتركزو وتتكلمو فلحصة كيف تبغو تفهمو بكاءحزن
 
خامس شي : المراييل
مراييلنا كاننا طباااااخين والحزام فوق الصدر مدري كيف ولا الازارير اللي قد ايش كبرها ككككككك
مرا تضحك وربي خخخخخخخ الله يعين كلها سنة هانت خلاص
 
سادس شي : التصوير
تخيلو بالله مدرسة قد ايش كبرها مافيها غير طابعة وحدة وتجي اوقات يقولو مانصور مافي
افتكر قبل ايام الاختبارات بكم يوم فلترم الاول  وربي رحت مع كم بنت نبغا نصور اوراق المراجعة قالولنا مافي تصوير
يعني ايش نسوي باللهي؟ نرسب؟؟ قهررر غاضبشدة الانفعال<دافورة عبقري تف تف عليا خخخ
 
تقريبن دي اهم الاشيا اللي قاهرتني ورافعتلي ضغطي وسكري
 
الاشيا الكويسة : انهم يأشرولنا الاشياء الموهيمة , وقت الاختبارات النهائية يسيرو طيبين مررررا ويحبونا ككككككككك
 
 
انتهى
 
 
 

والنفوس اتغيرت حتى نسينا كيف نسامح والقلوب اتحجرت والكلام سار جارح (كاميرات ديجتال سوني sony)


هااااي
 
كيفكم ؟
 
انشالله كويسين
 
تودي كان مرا مرررررا فلة (ضحك وحماس وبسرعة مرر اليوم)
 
ماسار شي موهيم او مضاربات بس كلو ضحك وطقطقة
 
بس سرلي موقف بايخ باايخ اوي قبل حصة التوحيد مع شنطتي كركركرشكل صوتي ندى عارفة
 
ايش كماااان فلفسحة شوفت رحيبة وع وع
 
مغرقة عيونها كحل تحسب نفسها بتسير مزه بكدا إغاظة اللهم لاشماته
 
ممممم .. دحين انا فبالي ابغا اشتري كاميرا ديجتال , سوني < , بس محتارة في اشكال كتيرة
 
وكلها احلا من بعض ومميزاتها برضو احلا من بعض فمرا محتاارة
 
قولت احطلكم صورة اخر وحدة عجبتنني وخشت مزااااجي خلاص بسس فيها عيب ححطو فلنهاية ..
 
يمكن اخدها ويمكن اشتري شااحن لحقت بابا وخلااص
 
نوعها سوني sony والبكسل : 10 , لونها فوشي , رقمها : T700
 
مواصفاتها :
 
الـمواصفـات :

ذاكرة داخليه بحجم 4GB !!
مع امكانيه اضافه ميموري
Duo/Pro Duo

10.1 ميجابكسل

4x optical zoom

شاشة LCD عريضه وساطعه مقاس 3.5

تاتش سكرين Touch Screen

فيها نظام Face Detection and Smile Shutter technologies

تصوير فيديو

البوم صور مع خاصيه تعديل الصور ( اطار – رسومات .. الخ )

وتسوي عرض شرائح مع صوت .. والصوت يكون حسب اختيارك مع امكانيه شبكها بالتلفزيون

 
Cybershot T700 by cassie05.
 
Cybershot T700 by cassie05.
 
Cybershot T700 by cassie05.
 
عيوبها : بطاريتها  مدتها قصيرة , الشاشة مستواها مو قد كدا
<وقت البطارية هوا اللي خلاني اتردد لانو حتجي اوقات بصور ومافي كهربا بكاءولامواصفاتها جوناان
 
فمرا ماني عاااارفة
 
خلاص سيبكم من موضوع الكاميرات
 
نجي للزبالة اللي كل يوم بشوفها  , وفي زبايل تانية لاكن ريحتها لسا ماطلعت خخخخ
 
احوب احطلكم دي الكلماات لانو اكيد انتو كمان انحطيتو فمواقف مع >زبالة خجل
 
الناس اجناس طيبين وانجاس ناس تحس انك معاهم في قمة الامان لكن لاسف الواقع يقول غير هادا الكلام
يتمنى الواحد منهم انو يطعن من وراك او ينساك في مواقف وانت محتاج احد معاك
 الغيره والحسد والحقد والمصلحه , عند الناس سارت تستخدمها اسلحه , والوضع سار ميؤوس استحاله نصلحه
الفلوس سارت ضابط تربط بين كل البشر  , والي تتوفر معاه على غيره انتصر , انحصر هم الناس بين المال وبين المنصب , والحياة سارت حسبه بفلوسك لازم تحسب ..
 لا تحسب ان الناس الي اليوم يضحكون لك يرفعونك  , لو تطيح لا تستبعد يجحدونك .. اليوم يضحك معاك بكره يضحك عليك .. ما تنفع العشره ولا الطيبه الي فيك ..
الناس اجناس طيبين وانجاس , والمعادن تختلف من نحاس والماس  , والاصيل ما يتبدل مهما طالت الازمان  , والخسيس ما يتعدل مهما يكون طبع الانسان ..
ناس تشتريك والسبب انك رجال , وناس الوسخ دنيا تبيعك لو بنص ريال , هذا الحال لازم ترضى فيه وتحاول تقتنع , ان الناس اجناس
فيه الطيب والجشع ,
والبشع في اخلاقه , والذميم في صفاته , والصفات الي اقصدها صفات الواحد في اعماااقه , و الاعماق باختلاف انواع الناس تختلف , ينعرف الي بداخل كل انسان ينعرف ..
نسمع كثير عن واحد باع اصحابه , علشان يتقرب من وحده او ترضى به..
ناس تبيع السنين وتشتري الثواني .. كيف الواحد لاجل نزوه يقدر انه يسير اناني ..
غريبه كيف يبيع اصحابه بهالطريقه , والغريبه كيف يواصل المسار في طريقه .. والمصيبه , يجي يوم يقعد يندم على اصحابه , يندب حظه او يتحسر على الي جنت افعاله..
الناس اجناس طيبين وانجاس , ناس تعزك باحساس او تسقيك من مر الكاس , والطيب بين الناس اسمه مغفل او مجنون , والمغفل فهالدنيا ما يحميه اي قانون ..
 ((والنفوس اتغيرت حتى نسينا كيف نسامح , والقلوب اتحجرت والكلام سار جارح , مستحيل انه بيوم الاوقات الحلوه ترجع  , الا الحين ذكريات تذكرها وعينك تدمع.. )) <اعششق دا المقطع
نذكرها واحنا نقول وين ايام زمان ؟ هل يا ترى  ترجعي او تنضمي للنسيان ؟ .. مستحيل انك تحلم نفس حلمك مرتين , الي راح انتهى ما في داعي تبكي العين ..
مافي داعي تعيش نفسك في دوامة ذكراياتك , في المقابل انك تهمل الي باقي في حياتك .. في النهاية هالنصيحه يمكن يوم انها تفيدك , عيش حياتك وارضى ربك لاتتناسى تبر والدينك ..
 
يسلم فمو اللي الف دي الكلمات بجد بجد كل كلامو صححح
 
انشالله تكون عجبتكم سوري معلش التنسيق مو قد كدا عشان طفشانة وقرفانة
 
يلا برب نشوفكم المرا الجاية

طفح , اكل , طعام , ايت ,eat كل شي يتعلق بالطفح


 

 
 
هاايزز
 
صباح الدونات بالشوكلت وعصير بالـ(النوع اللي تحبوه)
 
مساء الفرنش فرايز والبيبسي بالتلج يمي
 
التوبيك دا كلو عن الاكل والطفح والطعام وواختلفت الاسامي والمعنى واحد
 
مين مايحووب الاكل؟؟؟
 
طبعن محد عشان كدا حبيت انزل دا التوبيك مع الطفش
 
رغم انو بكرا في اختبار فيزيا  بس لازم اخربها شوية
 
احم احمم ترا جالسة لوحدي كلهم نايمين والسسسسهرة هدووووووء <زي الجنية ككككككك
 
<خرجت عن الموضوع الاصلي كالعاده كح كح
 
اني ويززز اكتر اكلتين احوبهم هما دونااتزز & فرنش فرايز
 
 
المشروبات اللي احوبها كتيرر
 
ااهمها (افضل مشروب) دايت بيبسي بس من كتر ما ارسل الحارس سرت اقولو بيبسي دايت <كلو من جارتي ككككك هيا عرفتني عليه كح
 
تاني مشروووووب احوبو هولتسن فرولة واااااااااااااااااو يصرررررع يدووخ <زي الصروب ككككك
 
تالت شي العصيرات بانوعها اكسبت عصير الفرولة والمانجو والجوافة دي مااحبيتهاش
 
بكدا تكونو عرفتو اكتر الاكلات اللي احوبها 
 
اكلات الطوارئ :
 
طيب انا بماااااني انساناا اعششششق السهرر
 
شي طبيعي رح اجوع فليل وبماانو مرررررررا ماعرف اطبخ
 
ماااافي غير الاندومي <اكلتي المفضلة لحالات الطوارئ
 
بيكاز سريعة ماتطول ولزيزا وتشبع يعني اضمن انو طول الليل ماحجوع تاني
اكتر نكهه احوبها كاري بعدها شعيرية بعدين خضار البقية مو قد كدا
 
تاني اكلة سريعة كورن فليكس  , اللي بالشوكلت مانقولو غير كور الشوكلاتة كككككك
 
كيف اسوويه؟؟ اجيب زبدية ميديام سايز واحوط موية اكتر من النص بشوية واحوطها فلمايكرويف
 
وبس استناا شويتين لين مايصفر واحوط ملعقتين حليب بودرة ملعقتين سوكر واقلبو واخدو الصالة مع علبة الكورن فليكس
 
^^^^^
حاطة الطريقة للي مايعرفو ككككككككككك <تحسب في ناس زيها
 
تاالت اكلة سريعة روغم اني مااسويها الا ازا ماتوفرت الوجبات اللي فوق
 
هيا السندوش
 
اجيب عيش من اللي باقي
 
ويكون ناشف واجيب جبنة كيري وانا ابكي
 
واحطهم فوق بعض وااكل  خخخخخخخخخخخ
 
وكاسة موية وبس
 
 
 
المطاعم :
 
مااروح غير مع اهلي لسا ماوصلت درجة الفلة اني اروح مع صحباتي غير فحالة وحدة "ماك" ,"M" >ماكدونالدز
 
من الاماكن اللي احوبها : ستار بكس  <علا روحت دبي اااااه بس  , بارنيز <دايمن نروح عالفجر مع بابا  , ماك طبعن دايمن مع صحباتي , بيزا هت < دايمن معا ماما  , المطاعم الصينية حافضيننا من كتر مانروح خخخ
 
وطبعن اسكريم باسكن اااااه ياباسكن , واسكريم ذكرى كان كويس دحين سار كلو موية , اسكريم موهند , اسكريم ماك فلوري من ماكدونالز … الخ
 
الحلى : احسن شي حلا البيووت اللي يسو خالاتي وحريم اخوالي واللي تسويه اوخت مروج اح بس عليه , وفي حلا التوفي اللي فحلويات العماد يصرعني
 
 
اشيا موستحيل اكلها : اللحوم بانوعها  ,سبانخ,حليب سادة,حليب ناقة خخخخ,الحلويات المطاط ديك وحلاوة القطن منتو وفرموزة ومشتقاتها من كبيبة ..الخ
لازانيا,ام علي,مصقوع ومصفوق ومدري ايه الاكلات دي الشعبية والله اشيا كتير بس مو فاكرتها بس تقريبن حطيت الاساسية
 
يلا كلكم حطو الاكلات اللي تحبوها واللي ماتاكلوها
 
خلونا نسير مفاجيع شوية وبطلو اتيكيت زايد
 
يلا ياعسوووولين فمان الله
 
 

ايميل @msn بدال اميل @hotmail


هاااي لكل اللي بيزورو سبيسي
 
كيييفكم؟؟؟ ابتسامة عريضة
 
حبيت احوطلكم طريقة ايميل @msn لانو كتير سالوني رائع احم احم
 
وكوووونت كل مرا اسوي سيرش عشن اجيب اللينك واشرح ومدري ايه
 
فقولت احوطلكم الرابط هناا واللي تبغا تسويلها ايميل طوالي تخش اللينك وتعمل ايميل بنفسها عبقري
 
اني ويزز اللي مارح تفهم من التوبيك دا تسالني اما في الماسنجر او تحوط كومنت ..
 
وهاداااا اللينك  قوس قزح
 
 
انشالله كلكم تستفيدو
 
وادعوولي
 
وبس فمان الله ياسوكرين خجل

تكريم الرئاسة احم احم كح كح


هااي
 
كيفكم كككككككككك
 
انشالله كويسين
 
امس كناا فلرئاسة وكرمونا ياويلي عالفشلة
 
المووووووهيم رحت ورجعت مع ليون
 
كنا 4 وفلرجعة وقفنا ماك وكااااااااااااي وربي كاننا من قرية مرا مررا فشلة والمصري يضحك علينا
 
بس هادا امس
 
اماااا اليووم اوخت صحبتي ابوها ضربها عشنها زعقت واصحابو عندو كككككككككك
 
فااتخيلو بالله الرجال فز من الزززززعقة انا رجعت البيت ونمممممممت صحيت علا المغرب
 
طفحت جلست عالنت اتفرجت الحلم الضائع وبعدو ميرنا وخليل
 
اليوم الصبح خالي جا عندنا بس انا كنت فلمدرسة سرو كانت غايبة عشن عيونها ملتهبة
 
وركب DSL بسسسسسس كداا
 
يلا مافي شي موهيم
 
يلا سلااااااام
 

انسااااك؟ كيف اقدر انساك ؟ واتحمل فرقاك يااغلى من في الكون :P بارتي بااااارتي


اولا رابط السسونقس ميبي في احد بدو يسمعهاا

 

http://www.youtube.com/watch?v=dIFpCAR96iU

 

واقف بين الناس على قبرك وانا ادعي  …  احاول احبس دمعي واكتم حزني داخل صدري

سامحني معد باقي في يدي شئ  …  غير دعائي لك يا غالي بما إني باقي حي

وادري اني في يوم راح ادخل من نفس الباب  …  هاذي سنة الحياة لازم نرجع للتراب

في النهاية هذا الموت ما يعترف بالأسباب  …  كل انسان في هاذي الدنيا راح يستسلم للغياب

ما اتخيل اني اقدر حتى ابعد عن ترابك ..  كيف يا صاحبي انا اصبر على فراقك

كل افراحي في قلبي ماتت معد باقي شئ يفيد  … ما اتخيل انو الشمس بكرة تشرق من جديد

مالي الا احزاني وانت با بين الاكفان  …  وادعي ربي انو يغفر ذنبك يا اعز انسان

ربي يا كريم ياقيوم السماوات  …  ارحم عبدك المحتاج يامجيب الدعوات

انساك كيف اقدر انسااااااااااك ؟  واتحمل فرقاك يا اغلى من في الكون
ذكراك عايش على ذكراااااااك في كل لحظة معاك عايش على طول بكاء

 

كدا جات فبالي احطلكم الاوغنياا دي مرررا احوبهاا

اوبس نسيت .. كيفكم اخباركم ؟؟؟؟ انشالله كويسين

اخرر الاحدااسس اللي سارتلي امس

روحت بيت ستوو وكااااااان مررا فلله سارت نقاشات ووريتهم البريسزز تبعي طبعن عجبهم احم احم خجل

وسالت خالتي عن ابلة الدين حقناا ابلة صفية

لمن قالت انو فلهبة الابو يعطي الولد زي البنت مرتين زي فلورث حزن طبعن كل الفصل قلب عليها وقتها

لين قالتلناا العلماء اعلم منكم ومني وهما اللي قالو الهدية والعيدية وغيرو ينعطى الولد ضعف البنت

 

سكتناا مانقدر نناقشش بعد كدا لاكن جبتلها من اكتر من مصدر انو كلامهاا كلو غلط فغلط وانشالله السبت رح وريها الاوراق واتفاهم معاها

مسالة حياة وموووووووووت دي غاضبغاضب كح كح نرجع لموضوعناا فبيت ستو

رحناا ومعاناا دونات <<عشقي الابدي إغاظة رحنا فرحانين ورجعنا فليل مسطلين

اليوم رح نروح لمرت خااالي مسويتلنا بارتي موحتررررررم من انواااع الطيبات هيا كمانا ماشالله عليها طبخها رهيب

بعد شوية حنروح انشالله … قبل دقايق سويت اييميل لباباا (الايميل المليوووووون ككككككك)

بس انشالله يكون الاخير ومااينسااا الباسوووورد

بوكرا رح اروح اخلع اسناني الاتنين الباقية حزنشفاه حمراء<شكل فمي كككككككككككك فاتكم خالي يقلي باين برطمك عشن البريسز وكدا

انشالله يوم الخميس رايحين الهدا <اعشق جوها مو زي جدة وع وع وع

 

يلا ماما تقوول البسوو بسرعة بسررعة

نشووفكم علا خير انشالله وردة حمراء


واخيررررن وبعد طول عناء ركبت بريسز (طقويم خخخخ..


هاايزز
 
كيفكم يابشرز؟؟ انشالله الكل مية مييييييية
 
حااابة اقولكم اني ركبت بريسزز خلاص وكسرلي سنين ااااح بس
 
وباقي 2 يوم الربووع حيكسرهم حزن
 
اللي يبغا الدحاا يقووول احااااا
 
بس احس شكلي سار مرا غير هع هيع هووع
 
كان نفسي اصورو وانزلو بس عشان سبيسي عااااام ماينفعشش حيرة
 
ايش كمانااا ؟؟ مممم ايوا صح بدات الاجازة
 
من يوم الاتنين خلاص كان اخر يوم لناا
 
مرررررا نفسي نفسي نفسيييييي ارووح دبي فدي الاجازة
 
او ننقل من بيتناا الموهيم انوو نستفيد منها
 
لاكن مرا طنااااااش كاني انبح مع نفسسسسي شدة الانفعال
 
عالعموووووووووم كلهاا اسبووع وخلاص نرجع للهمم مريض
 
يلا برررررررررب ياحلووووين بروح اشوف شووغلي

توتي toty مات الله يرحمه :(:(


هاااااي
 
كيفكم قايز؟
 
اليوم كان مرا مررا بيض بشكل مو طبيعي
 
عاادي ماسار شي فلمدرسة اختبرنا رياضيات وسهل الحمدلله
 
بعدين فلبيت نمت العصر صحتني رحما اللي يشيلها غاضب فعز نومي تقولي مااات مااااااات
 
اناا حيرةبكاءبكاء مييييييين ماااااات يارحمة ؟؟
 
الارنب <قالتلي
 
انا كونت حديها داكا الكف بس مسكت نفسي ورجعت نمت رجعت صحتني تقلي مات مرا حقدت عليها وجلست ازعق
 
وجاااااااااع شي مرا يقرف قلتلها مات طب انا ايش اسويلو وربي مرا قهرررررررتني
 
رجعت نمت ماكملت 10 دقايق ماما صحتني تقولي يلا موعد الاسنااااان
 
اناا خلاص جاني انهيار اقلها الله يخليكي اجلييه مابغا اروووووح بكاء
 
بس ورحت حطلي فواصل (حلقات) وبعد بعد بوكرا رح يركب جهاز دعم ومدري ايه
 
عالعمووم اليوم كان مرررا بيض ايييجج واهم حدث سار انو توتي (الارنب) مات
 
الله يرحمو
 
يلا باي ياحلوين

نشر سبيس في قوقل spaces in google انشر سبيسك


انشر سبيسك في قوقل google
 
السلام عليكم 
 
 حبيت احط طريقة سهلة لنشر ( سبيس  , منتدى , موقع .. الخ فقوقل
 
طبعن اشهر محرك بحث هوا google عشان كدا رح احطلكم طريقتو
 
هنـاك طريقتين انا رح احط السهلة بس لانو التانية صعبة شوية

Arrow الطريقة الاولى إضافة الموقع يدويا عن طريق مواقع محركات البحث كتالي :-

1/ إضافة موقعك في محرك البحث قوقل google عن طريق الرابط التالي :-

http://www.google.com/intl/ar/add_url.html

2/ إضافة موقعك في محرك البحث ياهو yahoo عن طريق الرابط التالي :-

http://submit.search.yahoo.com/free/request

وإذا طلب منك إدخال اسم المستجدم وكلمة المرور فادخلها طبعاً إذا كان معك بريد في الياهو يمكنك

الحصول عليه بسهولة

Enter your URL بجواره تكتب عنوان موقعك مثلا
ثم اضغط على الزر submit URL

وبس كدا انشالله استفدتوووو ياحلووووين
 
يلا سي يووو
نشر سبيس موقع منتدى منتديات انشر سبيسك اشهر قوقل ياهو

يوم الدشرة العالمي لياا فلللللة مرا خربناها داك اليوم خخخخ


هاااايووووو
 
كيفكم ؟؟ انشالله كلكم كويسين وتمام واي خدمة
 
اليوم ربووع اختبرنا فقة خلاص ومرا كان سهل يسعدها ابلة صفية خجل
 
اليوم ماسار شي خطير يعني بس رح احكيكم علا امس وقبل امس كانت ايام مليانة احداسس
 
يوم الاتنين كان يوم الدشرة العالمي صحوني العصر رحت دكتور مرغلي وسوالي عجينة التقويم وجلس يهزئني شرير غاضب
 
قلي الخميس حيحط فواصل وكدا , بعدها رحنا سوينا اشعة فلصاعدي وفحص عيون اسرا طلع فيها كيس دهني وسوا العملية فوقتها
 
مرا خطييييييييررررة العملية ودم وواااااااو عبودي كان خايف وشوية ويبكي لوووول ايش كماناا بعدها حمودي دق علا ماما واحنا لسا فلمستشفى
 
قلها الاستاز يبغا ارنب يبغانا نشرحو ونشوف قلبو وهوا يتحرك ويديني 10 درجات حقت النشاط  قامت ماما قالتلو طيب دحينا راجعين
 
رحنا محل الكمبيوترات ورميناا اللابتبين حقت بابا وحق سرو 2 <شكل صوتي , تلاقي الرجال شخ ضحك علا شكل سرو بالربطة ديك زي العورة
 
اني ويز رجعنا البيت وطواااااالي نزلو حمودي وندو وطلعت اسرا وعلا عينها ديك الربطة الي قد اييييييه كبرهاا عبقري
 
وركبوو ورحنا علا جرووووووول بيب بيب , لقينا ارنوب كتكوت كدا بوني مرا يناسسوو عليهخجل دي صورتو
 
 
ولقينا بساا عند مامتها جابها لنا المصري والاووم مرا عااااااادي ولاهمها تشوفو يشيل بنتها وعاااادي <زعلانة بيكاز خليت المصري يشيلها من امها ومرا حاسة بتانيب ضمير
 
واحنا فلسيارة عادي كلو تمام شويا كدا البساا ترفس فلكرتون وتخربش فيدي انا مارضيت افكها لانو مشينا نص السكة لو فلتها داك الوقت اي سوير ماحتلاقي امها لو تموت
 
 لانو بعدنا مرررررررا عن المحل وغير كدا سيارات رايحة جااية رح تندعس البسة مرا صغيرة
 
وصلنا البيت روشتها واكلتها ونومتها وكل حاجاا خلاص ابتسامة عريضة دي صورتها (ملاحضة القفص تبع هامستر)
 
 
في صور كمان فلالبووووووم روحو شوفوها الموهيم نمناا وخلاص صحيناا الصبح علا رييييييحتها وع وع وع سوت داكا الشي وتعالوو شوفو الرييحاا كيف مريض
 
ماما قالت خرجوها ريحتها مرررا لاااا , خرجتها وانا نازلة بركب السيارة بروح المدرسة ومو راضية تبعد تمشي ورايا (والله كانت تجري مو تمشي كمان)
 
وتتمسح فعبايتي يااااحرااااااااااااااااام بس ماعرفت ايش اسوي شوية وابكي بس ركبت طوالي ورحت السكوول وقرفانة يومتها
 
رجعت ادعي اقول يارب ياارب الاقيها مالقيتها حزن مدري فين راحت خلاص حزنحزن بس ريلي مرا ندمت اني اخدتها من مامتها
 
يارب سامحني انشالله تلاقي امها وخلاص ومايكون سرلها شي
 
ذاتزز اول نشوفكم فبلوق تاني باززن الله

مرسى الاحلام


كيفكم ؟ انشالله تمام حبيت احوط اخر الاحداث اللي سارتلي
 
الموهيم امسسسس كونت فجدة ورحنا اكوابارك مرررررررررا انبسطت وغيرت جو الحمدولله
 
بس سرو وعبودي كانو نايمين اتخيلو خارجين نفلها ونغير جو ودولا ينامو <بابا قال باللهي دي اشكال خرجات خخخخ
 
بعدينا بابا طنت فراسو يبغا يعسل , لاكن ماما قالت ماااافي نوو وي تبغا تعسل احنا نعسل معاك
 
قال طيب ليش لا ايش تبغو ؟؟ انا فرولة خجل وماما تفاح وبابا تفاح قال لحمودي يلا قووول للرجال اتنين تفاح واتنين فرولة
 
بس وجلسنا نستنا حماااااااس رائع لاول مرا فحياتي حعسسسل <<دا كلو بقولو فنفسي
 
شويا بابا قال لماما نجلس ولا خلاص نرجع ؟ قالتو كلو جلسة جلسة يعني نفس الشي
 
قال خلاص يلا نرجع وكنسسسل عالمعسل ياخسسسارة <<عندها قابلية للانحراف خخخ
 
بس صحينا النايمين ورحنا بيت جدة ونمناا ماصحينا الا عالضهر كدا 11 مومكن فطرنا وجلسنا شويتين حاولت اخش نت مافي بعدينا لمينا اغراضنا
 
ورحناا لفلفنا اكتر من محل كدا بس هبل واخيرررررررن رحنا مرسى الاحلام رحنا فيها المطعم العائم مرا بيضضضضض  لحد يروح مرا يدوخ ويجيب الصداع
 
لفينا بين اليختات <جمع يخت بلوغتي خجل بس عشان شمس رجعنا بسررعة (شوفت اسماك تجنن بس ماكان معايا الشبكة ياخسارة )
 
بعدينا رحنا مطعم تاني غيرو وطلبنا وكل شي واحنا نستنا الطلب شوفنا رحلة لمدارس فقية اللي فمكة جايين ركبو اليخت
 
ومرررررررا كتيرين ماشالله امممممة كاملة وواشكال والواااان طوالي بعدها احضرو الطعام <صح يافصحىىىى
 
اني ويزززز جابو وجلسنا ناكل الا شوياا كدا ماكملنا 5 دقايق والله
 
الا جات ديكاا البساا السودا عند رجول سرووو وتنط ديك النطة علا ضهر بابا
 
وانواااااع الزعييق والدمووع والمخاااااطين كل شي تبغوه
 
ورررررررربي الرجال شرق وعيونو كبرت حتا ضهرو شكلو انكسر من الفجعة مسكين ماعرف ايش في؟
 
كككككككككككككككككككككككككككككككك بس وسرا ترتجف وحمرت ودموعهاا اربعا اربعاا
 
مرا فجعتنا الكلبة والله والبسة قربت كماناا اكتر راحت نطت علا جهت ماما وتبكي وترتجف وحالتها زي الزززززفت
 
ماعرفنا نجلس كويس وكل شوية البسة جاية رايحة بس مرا يناسوووو
 
بعدها ماما قالت لازم نعالجها من رعبها دا ونجيب بسة فلبيت = ادتني الاذن انو اجيب بسة فبيتناا حماسووو
 
رجعنا مكة عالعصر كدا
 
وعالمغرب جونا مرت خالي واولادو وحماس اتفرجنا فلم هندي  مو بس خطييييررر نفسي احكيكم قصتو بس تعرفو الافلام الهندية كيف
 
بلمختصر انو اوربية تحوب هندي فاا تخيلو هيا مسيحية وهوا هندوسي قامت امو اجبرتو يتزوج هندية زيو لاكن طلعت ديكا حامل … خلاص دي القصة بلمختصر
 
ياربي ايش كمان سار ايوا بنت خالي شغلت لابي بدون ماادري تخيلو وجااع مرا انقهررت من حركتها
 
عندي اختبار فيزيا فصلين ولين دحينا مالمستو
 
دي اهم الاحداث اللي سارت تووودي بس كدا وخلاص يلا انتبو علا نفسكم
 
وادعووولي الله يفرج عني ضيقتي 
 
يلا بايوو
 

وقطعت دودي ورقة الاختبار ككككك <خبر الشهر


السسسلاموو عليكم
 
ازيكووو ياقدعان؟؟
 
انشالله تكونو مية مية
 
احكيكم ايش سار اليوووم (ربوع)
 
طبعن انا صاحية من الصباح منكدة = روحت السكول وانا منكدة 
 
ووقبل اختبار الحاسب قالولي جزء ماني مأشرتو ولا زاكرتو اصلن فاا مرا اتوترت  (دا قبل الاختبار بدقايق)
 
الموهيم قالتلي ندى رح يجي صلي <= هيا قصدها سوال تاني بسس وانا قراتو مرتين علا اساس انو صلي
 
وتخيلو جانا فراغات عاد انا هيع هوع كدا سار فيسي حيرة قولت لاابلة سهام رياضيات جيبووو ابلة عهووود حاسب
 
والله ياناس مو لحالي ابغاها كلهم يبغوها قالتلنا سهومة خانو اينو ابلة عهود ماجات المدرسة راحت اجتماع
 
قولتلها والله ماحسلم الورقة الا لمن تجي ابلة عهود غاضبغاضب قامت ابلة سهام عصبت وقتها وقالت وانا ماحخرج الا بالاوراق غاضب
 
والله واشوف البنات يغشوو فداك السوال بس انا تعبت فلمزاكرة واخرتها اغش؟؟ مرررا نت فيرر حزن
 
وكمان وقتها النفسية كانت فلحضيض رحت شقشقت الورقة قطع قطع بقهررر ورميتها عالطاولة
 
جات ابلة سهام اخدتها وقالتلي جيبي اللي طاحت (بقايا الاوراق) وطيت وقلتلها استني اشقشقها اكتر عشن ماتبان الاجوبة وقطعتها اوصال صغنطوطة
 
ورميتها فيدها , قالتلي يلا دحيناا اخرجي من الفصل قلتلها مابغاا غاضب<<لحد يسالني فين كان عقلي وقتها لوول
 
طبعن الابلة سكتت ماقالت شي وانا ساكتة شوية سلمت مروج ورقتها وخرجت , قمت وقفت بسرعة وجري عالباب وخرجت
 
 
 بنت________قلب مجروح
 
وات ايلس ممم .. لمن رجعنا البيت سرو حطت فراسها اننا نروح البقبق <= دلع البقالة خ خ خ
 
الموهيم قولت فنفسي يادودي قدك منكدة روحي غيري جو بس ماكان معايا الا باقي المصروف بس فاا قولت لسواقنا (اشرف)
 
استنى دحيناا رح ننزل طلعنا واخدنا فلوس ونزلناا دورنا عليه ماااااهو في بكاء <اليوم نحس نحس
 
قمت دقيت علا ماما وشووووووفي ترا الكلب دا قلتلو استنى وطنشني وراح
 
ماما دقت عليه شويتين كدا وررررجع تخيلو واحنا فلطريق سار شي مورعب مورعب
 
كونت حسويها علا نفسسي من الررررعب حيرةحيرة الحمدولله عدت علا خير
 
اللي يبغاا يعرف يسالني اخاف اكتبو هنا يسيرلي شي نحس تاني
 
هادا كووم والاحلام اللي بحلم بيها فلييل كوم تااني حزنبكاء
 
اصلن اناا ليا كم يوم كدا متنرفزاا ومعصباا من وحدا زبالا والفني ثينق  انو هيا الغلطانة وسبب المشكلة كلها من تحت راسها
وانا المضلومة يعني اي دونت نو كيف الدونيا دي ماشية بلعكس ولا ايش بالزبط معرفش
 
ان الله يمهل ولايهمل شالله بيجيني حقي واكتررر ادعووولي انو الله ينصرني عليها ويوريني فيها يوم حزن
 
خلاص يدي تعبت وانا بكتب اسيبكم دحيناا
 
Bye

حسبي الله ونعم الوكيل


حسبي الله ونعم الوكيل
 
والله ماح اسامحك لا دنيا ولا اخرة على الكلام اللي قولتيه والله شاهد بيننا

قال أبو يوسف { فَصَبْرٌ جَمِيلٌ وَاللّهُ الْمُسْتَعَانُ عَلَى مَا تَصِفُونَ }

حسبي الله ونعم الوكيل

حسبي الله ونعم الوكيل

حسبي الله ونعم الوكيل

 

ضلمتني واتبلت علياا وقولتني اشيا ماقولتها

وهرجت عني كلام مالو داعي وكدبت عليا

يارب دعوة المضلوم مستجابة يااارب دي البنت ضلمتني وافترت عليا

يااااااارب خد حقي منها عاجلن غير  اجل

ثبت في الحديث عن ابن عباس – رضي الله عنهما – أن النبي -صلى الله عليه وسلم – بعث معاذاً إلى اليمن وقال له : ( اتق دعوة المظلوم ، فإنها ليس بينها وبين الله حجاب ) رواه البخاري ومسلم .

( اتقوا دعوة المظلوم فإنها تحمل على الغمام ، يقول الله : وعزتي وجلالي لأنصرنك ولو بعد حين )

 

وهيا ظلمتني يارب يارب بكاءحزن


تابع

Get every new post delivered to your Inbox.